“அமைச்சர் பெ.விஸ்வநாதன் மீது பொய் புகார்; ஆர்.எஸ்.எஸ். வெறுப்பரசியலின் வெளிப்பாடு” – மாணிக்கம் தாகூர் கடும் தாக்கு!

தமிழக உயர்கல்வித் துறை அமைச்சர் பெ.விஸ்வநாதன் மீது தமிழக பாஜக தலைவர் நயினார் நாகேந்திரன், தமிழக ஆளுநரிடம் உண்மைக்குப் புறம்பான புகார் அளித்திருப்பதாக தமிழக காங்கிரஸ் தலைவர் மாணிக்கம் தாகூர் கடுமையாக விமர்சித்துள்ளார்.இதுகுறித்து அவர் வெளியிட்ட எக்ஸ் பதிவில், அமைச்சர் பெ.விஸ்வநாதன் மீது அளிக்கப்பட்ட புகார் வன்மையாகக் கண்டிக்கத்தக்கது என்றும், அது ஆர்.எஸ்.எஸ். அமைப்பின் வெறுப்பரசியலை வெளிப்படுத்துவதாகவும் தெரிவித்துள்ளார்.மேலும், தமிழக முதல்வர் ஜோசப் விஜய் மற்றும் மக்களவை எதிர்க்கட்சித் தலைவர் ராகுல் காந்தி ஆகியோரின் பிறந்தநாளை முன்னிட்டு, அமைச்சர் பெ.விஸ்வநாதன் தனது சொந்தத் தொகுதியில் விளையாட்டு மற்றும் குழந்தைகளுக்கான யோகா நிகழ்ச்சிகளை அன்போடு நடத்தியதை குறை கூறுவது, “காமாலைக் கண்ணனுக்குக் கண்டதெல்லாம் மஞ்சள்” என்ற பழமொழிக்கு ஒப்பானது என்று குறிப்பிட்டார்.அத்துடன், தாழ்த்தப்பட்ட சமூகத்தைச் சேர்ந்த ஒருவர் உயர்கல்வி அமைச்சராக இருப்பதை ஏற்க முடியாத ஆர்.எஸ்.எஸ். சித்தாந்தத்தின் வெளிப்பாடாகவே இந்த புகார் இருப்பதாகவும், ஆர்.எஸ்.எஸ். ஆதிக்கத்தை உயர்கல்வித் துறையில் நிலைநாட்டும் நோக்கத்துடன் இந்த குற்றச்சாட்டு முன்வைக்கப்பட்டுள்ளதாகவும் மாணிக்கம் தாகூர் குற்றம்சாட்டினார்.இறுதியாக, அமைச்சர் பெ.விஸ்வநாதன் மீது ஆளுநரிடம் அளிக்கப்பட்ட அறிக்கை, ஆர்.எஸ்.எஸ். அமைப்பின் வெறுப்பரசியலையே வெளிச்சம் போட்டுக் காட்டுவதாக அவர் தனது பதிவில் தெரிவித்துள்ளார்.